सर्लाही। सर्लाहीको कौडेना गाउँपालिकाले माध्यमिक शिक्षा परीक्षा (एसइइ) २०८२ मा उत्कृष्ट नतिजा हासिल गर्ने विद्यार्थीलाई नगद पुरस्कार तथा प्रमाणपत्रसहित सम्मान गरेको छ। विद्यार्थीलाई शिक्षाप्रति प्रोत्साहित गर्ने उद्देश्यले गाउँपालिकाले उत्कृष्ट विद्यार्थीलाई आर्थिक पुरस्कार प्रदान गरेको हो।गाउँपालिकाभित्रका सामुदायिक विद्यालयबाट एसइइमा ए प्लस जिपिए प्राप्त गर्ने एक जना छात्रलाई ५० हजार रुपैयाँ र ए जिपिए प्राप्त गर्ने नौ जना छात्रछात्रालाई जनही २५ हजार रुपैयाँका दरले पुरस्कृत गरिएको गाउँपालिका अध्यक्ष रुपेश कुमार (बब्लु) ले जानकारी दिए।त्यसैगरी, एसइइ उत्तीर्ण गरेका १५ जना दलित छात्रछात्रालाई जनही १५ हजार रुपैयाँसहित सम्मान गरिएको अध्यक्ष बब्लुले बताए।कौडेना गाउँपालिका–१ सुन्दपुरस्थित देवधारी माध्यमिक विद्यालयमा आयोजित कार्यक्रममा गाउँपालिका अध्यक्ष बब्लु, उपाध्यक्ष नगीना देवी र प्रमुख प्रशासकीय अधिकृत सुरेश दासले विद्यार्थी तथा उनीहरूका अभिभावकलाई चेक र प्रमाणपत्र हस्तान्तरण गरेका थिए। विद्यार्थी र अभिभावकलाई शिक्षाको महत्व बुझाउनुका साथै उत्कृष्ट नतिजा हासिल गर्न थप प्रेरणा प्रदान गर्ने उद्देश्यले पुरस्कार वितरण गरिएको प्रमुख प्रशासकीय अधिकृत सुरेश दासले बताए।कार्यक्रम विद्यालय व्यवस्थापन समितिका अध्यक्ष सरोज राउतको अध्यक्षतामा सम्पन्न भएको थियो। कार्यक्रममा सर्लाहीका प्रमुख जिल्ला अधिकारी विजयराज सुवेदी, प्रहरी उपरीक्षक रवीन्द्रनाथ पौडेल, सशस्त्र प्रहरी उपरीक्षक अमरबहादुर खत्रीलगायतको आतिथ्यता रहेको थियो।